Biz meraca gedə bilərikmi?
İlahi qüdrətin etiqadı haqqındakı mühüm məsələlərdən biri də Həzrət Peyğəmbərin (s) meracı məsələsidir. Səmaya olan bu səfər Peyğəmbərin (s) əzəmətinin nişanəsidir.
Bəs meraca getmək ancaq Peyğəmbərə (s) məxsus idi, yoxsa başqa insanlar da meraca gedə bilərlər? Əgər belə bir şeyə imkan varsa, onda hansı şərtləri vardır?
Şübhəsiz Həzrət Peyğəmbərin (s) meraca getməsinin hədəfi İlahi iradə ilə idi. Bu səfərin həyata keçməsinə zəminə yaradan Peyğəmbərin (s) özü idi. Başqa sözlə desək Peyğəmbərin (s) gözəl xüsusiyyətləri bais olur ki, Allah Təala onu bu səfərə layiq bilsin. Allah Peyğəmbərin (s) bu xüsusiyyətlərini Quranda bəyan etmişdir. Bu xüsusiyyətlərdən biri - Peyğəmbərin (s) bəndə olması idi, yəni Allahın müti bəndəsi.
Həzrət Peyğəmbər (s) bu bəndəliyi sayəsində bu cür böyük feyzə layiq görülür. Belə görünür ki, hər kim bu bəndəliyə nail olarsa, meraca getməyə müvəffəq ola bilər. Ancaq bunun üçün həqiqi bəndə olmaq lazımdır.
Allahın bəndəsi olmaq, yəni mənəvi kamala çatmaqdır. Bu yol heç kim üçün bağlı deyildir. Bəndəliyə çatmaq üçün şərtlər vardır ki, Məsumlar (ə) onları şərh etmişdir.
İmam Sadiq (ə) həqiqi bəndə haqqında belə buyurmuşdur: \"Həqiqi bəndəlik üç şeydədir: Birincisi budur ki, Allah bəndəsi Allahın ona verdiklərinə görə özünü malik hesab etməməlidir. Çünki bəndələr malik olmazlar.
İkincisi budur ki, bütün hər bir malı, Allahın malı hesab etməlidir. Allahın əmr etdiyi yerlərdə həmin malı istifadə etməlidir.
Üçüncüsü budur ki, bəndə özü üçün hansısa işi məsləhət görməsin, ancaq Allahın buyurduqlarını etsin və qadağan etdiklərindən çəkinsin”.
Bu hədisdən həqiqi bəndənin xüsusiyyətlərini görmək olur. Həqiqi bəndə olmaq - yəni özünü görməmək, ancaq Allahı görməkdir. Bu məsələ də ancaq o zaman hasil olur ki, insanın Allaha mərifəti kamil və dərin olar. Ona görə də insanın mərifəti hər nə qədər artarsa, bəndəliyi çoxalar.
Bu mövzuya diqqət edəndə görmək olur ki, həqiqi bəndənin kamil mərifəti ancaq Həzrət Peyğəmbərdə (s) zahir olmuşdur. O, dərin İlahi mərifəti əldə edə bilmişdi. Ona görə də merac üçün layiqli görülmüşdür.
Həzrət Peyğəmbər (s) meraca gedir və səma mələkutunu müşahidə edir. Xilqətin sirlərini öyrənərək, İlahi lütf ilə geri qayıdır. Bəşərin dərk etdiklərini onlara təqdim edir. Ona görə də merac biz bəndələr üçün İlahi bir hədiyyə idi. Çünki biz yer əhlinin əli səma əhlinə çatmır.
Mehriban Peyğəmbər (s) İlahi məhbub olaraq, meracdan qayıdır və dərk etdiklərini həqiqi bəndə olmayan bizlər üçün bəyan etmişdir. Biz həqiqi bəndə olmadığımıza görə meraca gedə bilmirik. Ancaq Allah bu yolu biz insanlar üçün açmışdır.
Nəhayət deyə bilərik ki, merac və ya İlahi səfər Allahın iradəsi ilə həyata keçmişdir. Məhz Peyğəmbərin (s) bu səfər üçün seçilməsinin səbəbi o idi ki, Həzrət (s) həqiqi bəndə olmuşdur. Ona görə də meraca getmək üçün həqiqi bəndə olmaq lazımdır.