Quran və hədislərə əsasən namazın qəbul olunması üçün lazım olan 6 şərt hansılardır?!
Hədislərdə oxuyuruq ki, bəzi günahlar, o cümlədən: şərab içmək, qeybət etmək, zina kimi iyrənc işlər namazın qəbul olmasına mane olar. Hədislərimizdə saleh əməllərin və namazın qəbul olmasının şərtləri vardır ki, onlara nəzər salaq. (Tebyan)
Birinci şərt: Allaha iman bəsləmək.
İmana malik olmamaq əməli məhv edər. “Kim iman gətirməli olduğu şeyə kafir olsa, həqiqətən onun əməli puç olub və o, axirətdə ziyana uğrayanlardan olacaqdır”. (“Maidə” 5).
İkinci şərt: Vilayət.
Düzgün vilayət insanların ibadətlərini doğru cığıra salar və onlara düzgün yolu göstərər. İmam Baqir (ə) buyurur: “Hər kimin Allaha imanı vardır və taqəti çatan ibadətləri də yerinə yetirir, ancaq Allah tərəfindən İmamı olmazsa - səyləri faydasızdır”.
Bir nəfər İmam Səccaddan (ə) soruşur ki, hansı şey namazın qəbul olmasına səbəb olar? İmam buyurur: “Biz Əhli-beytin (ə) vilayəti”.
Deməli, namaz vilayət olmadan qəbul olmaz. İmam Baqir (ə) buyurur: “Bizim rəhbərlik xəttində deyildir, məgər o kəslər ki, əməl və təqva əhli olsunlar”.
Üçüncü şərt:
a). Təqva.
Quranda Adəm (ə) övladlarının hekayəsi gəlmişdir. Hər ikisi də qurbanlıq verir, ancaq birinin qurbanlığı qəbul olur. Qurani-Kərim buyurur: “Adəmin iki oğlunun (Habil ilə Qabilin) qurbanlıq zamanı olmuş əhvalatını həqiqi və düzgün şəkildə onlara oxu (Habil dəvə kəsdi, Qabil isə bir az buğda gətirdi). Beləliklə birindən qəbul olundu və digərindən qəbul olunmadı. (Qabil) dedi: «Səni mütləq öldürəcəyəm». (Habil) dedi: «Həqiqətən Allah yalnız təqvalılardan qəbul edir»”. (“Maidə” 27).
Həzrət Peyğəmbər (s) buyurur: “Əgər o qədər namaz qılsanız ki, kamanın simi kimi olsanız və o qədər oruc tutsaniz ki, kaman kimi əyilsəniz Allah sizdən qəbul etməz, məgər o halda ki, təqvalı olasınız”.
b). Namazda qəlb hüzuru.
İmam Baqir (ə) buyurur: “Namazda diqqətiniz Allahda olsun, çünki namazda o miqdar qəbul olar ki, sən ona diqqət etmisən”.
Dördüncü şərt:
a). İnsanların haqqını əda etmək.
Yoxsul insanların haqqını əda etmək - elə əməllərdəndir ki, bəzən ibadətlərin qəbul olması ondan asılıdır. İmam Rza (ə) buyurur: “Hər kim namaz qılar, ancaq zəkat verməzsə namazı qəbul olmaz”.
b). Halal və mübah əşya.
İmam Əli (ə) Kumeylə xitab edərək buyurur: “Ey Kumeyl! Nəzər salıb bax gör, nəyin üzərində namaz qılırsan və nəyin üzərində namaza dayanmısan. Əgər namaz üçün istifadə etdiyin şey halal və mübah deyildirsə, namazın qəbul deyildir”.
Beşinci şərt: Başqalarına qarşı xeyirxah olmaq.
İmam Sadiq (ə) buyurur: “Allah Təala buyurub: “O kəsin namazını qəbul edərəm ki, Mənim əzəmətim qarşısında itaətkar olar və nəfsani istəklərini Mənə xatir özündən uzaqlaşdırar. Gününü Məni yada salaraq sona çatdırar. Bəndələrimə lovğalanmaz və aca yemək verər, paltarsızı geyindirər, müsibət görənə mehribanlıq edər və qəribə pənah verər””.
Altıncı şərt: Xoşrəftar olmaq.
Ailədə ərlə arvadın münasibəti o qədər əhəmiyyətlidir ki, bəzən namazın qəbul olmasına mane belə olur. Bu haqda Həzrət Peyğəmbər (s) buyurur: “Hər kimin əxlaqsız və əziyyətverən arvadı olar, Allah həmin qadının namaz və yaxşı işlərini qəbul etməz”./Deyerler.