Mələklərin İmam Hüseyn (ə) zəvvarları üçün duaları!

Əbul-Qasim Cəfər ibn Muhəmməd ibn Qavləveyh Qummi öz sənədləri ilə nəql edir: \"Aban ibn Təbliğ İmam Sadiqdən (ə) nəql edir: \"İmam Hüseynin (ə) qəbrinin yanında dörd min mələk saçları dağılmış və üst-başları tozlu halda Qiyamət gününədək ağlayırlar. Onların başçısı olan mələyin adı Mənsurdur.
İmam Hüseyni (ə) ziyarət edənləri qarşılayır, onunla (ə) vidalaşanları yola salır, xəstələnənlərinə baş çəkir, vəfat edənləri üçün dua edir və cənazə namazı qılır, ölümündən sonra onlar üçün bağışlanma diləyirlər\"\".

Əbu Bəsir İmam Sadiqdən (ə) nəql edir: \"Uca Allah İmam Hüseynin (ə) qəbrinə yetmiş min mələyi müvəkkil edib, hər gün saçları dağılmış və üst-başları tozlu halda ona (ə) salavat deyir və zəvvarları üçün dua edirlər: \"Ey Rəbbimiz, bunlar Hüseynin (ə) zəvvarlarıdır! Onlara filan, filan xeyirləri nəsib elə\"\".

İbni Vəhəb İmam Sadiqin (ə) belə buyurduğunu nəql edir: \"İmam Hüseynin (ə) ziyarətini əsla tərk etmə. Məgər mələklərin dua etdikləri şəxslərdən olmaq istəmirsən?!\".

(Mənbə: \"Kamiluz-Ziyarat\" 41-ci bab)-- Hazırladı: Elnur Əlizadə,