Allahla rabitə insana nələri bəxş edir?
Allahla aşiqcəsinə rabitə qurmağın yollarından biri – zikrdir. Yəni, insanın ürək və dilinin Allahın gözəl adlarını tərənnüm etməsidir. Allahı yada salaraq insan ruh gülünü canlı və gümrah saxlayar.
Allahı yada salmağın fəzilətləri və böyük təsirləri vardır. Onların hər biri insan ruhuna əvəzolunmaz təsir qoyur. Bu təsirlər ibarətdir:
1. Allah Öz bəndəsini yada salar. Allahı yada salmağın ilk təsiri budur ki, Allah da insanı yada salar. Allah buyurur ki, Məni yada salın ki, sizi yada salım.
2. Ürəyi aydın edər. Allahı yada salmaq ürəyi nurani edər və ayıldar. Ürəyin dirilməsinin ən yaxşı əlacı - İlahi zikrə pənah aparmaqdır. Allahı zikr etmək haqdır və onu davamlı etmək ürəyi qəsavətdən və zülmətdən xilas edər.
3. Ürəyə rahatlıq verər. Allahı yada salmağın təsirlərindən biri də ürəyin rahatlanmasıdır. O kəslər ki, Allahı yada salar, ürəkləri Allahı yada salaraq aram olar.
4. Allahdan qorxmaq. Allahı yada salmağın bərəkətlərindən biri də İlahi qorxu və xəşiyyətin yaranmasıdır. Möminlər Allahın adını yada salarkən ürəkləri titrəyər.
5. Bəsirətli olmaq və şeytanı tanımaq. İnsanın süqut etmək amili – şeytanın tələsinə düşməsidir. Allahı zikr etmək insana bəsirət verər və insan da bu yolla şeytanın tələlərini görməyə başlayar.
6. Günahları bağışlanar. Allahı yada salmağın axirət bərəkəti – günahlarının bağışlanmasıdır. Bundan başqa, Allah ona böyük əcr və savab verər.
7. Hikmət və elm. İlahi zikrin gətirdiyi faydalardan biri də elmin bişməsi, kamala çatmasıdır. Zikr idrak qüvvəsini gücləndirər və düşüncələrin qaynamasına səbəb olar.
Həzrət Peyğəmbər (s) öz səhabələrinə buyurardı: “İstəyirsinizmi ki, sizi Allah yanında ən pakizə və yaxşı işdən, mənəvi dərəcədə əməlləri yüksəldən, sizin üçün dirhəm və dinardan daha yaxşı olan, düşmənlə üzləşməkdən yaxşı olan əməldən agah edim?”. Hamı deyir: “Bəli”. Həzrət (s) buyurur: “Bu, Allah Təalanı çoxlu zikr etməkdir”. (Tebyan)